ብፁዕ አቡነ ማቴዎስ በሀገረ ስብከታችን ተገኝተው ቡራኬ ሰጡ

ብፁዕ አቡነ ማቴዎስ የወላይታ ዳውሮና ኮንታ አህጉረ ስብከት ሊቀ ጳጳስና የቅዱስ ሲኖዶስ አባል በብፁዕ አቡነ ዘካርያስ የኒውዮርክ ሃገር ስብከት ሊቀ ጳጳስና የቅዱስ ሲኖዶስ አባል ጋባዥነት በቤተ ክርስቲያናችን ተገኝተው ቡራኬ ሰጡ። ብፁዕነታቸው አርብ ሐምሌ ፩ ቀን ፳፻፰ ዓ.ም. ሚኒያፖሊስ አውሮፕላን ማረፊያ ሲደርሱ በቤተ ክርስቲያናችን አስተዳዳሪ በ መልአከ አርያም ቆሞስ አባ ኃይለ ሚካኤልና በቤተ ክርስቲያናችን ካህናትና ምእመናን አቀባበል የተደረገላቸው ሲሆን በቀጥታ ወደ ቤተ ክርስቲያናችን በማምራትም በዚያው ሲጠብቋቸው ለነበሩ ምእመናን ቡራኬና ትምህርት ሰጥተዋል።


በማግስቱ ቅዳሜም የመጥምቀ መለኮት ቅዱስ ዮሐንስ ዓመታዊ በዓል ዋዜማ ላይ በመገኘት ቡራኬና ትምህርት ሰጥተዋል። «እግዚአብሔር አምላኩ የሆነለት ሕዝብ ብፁዕ ነው» በሚለው ኃይለ ቃል ተነስተው «ኢትዮጵያዊያን ከሀገራቸው ወጥተው በሄዱበት ሁሉ ከራሳቸው ቤት አስቀድመው የእግዚአብሔርን ቤት እንደሚሠሩ ሁሉ እናንተም ይህንን ታላቅ ቤተ ክርስቲያን ከራሳችሁ ቤት አስቀድማችሁ በመሥራታችሁ ይኼው አባቶቻችሁን በራሳችሁ ቤትና በራሳችሁ ሰዓት ተቀብላችሁ ማስተናገድ ቻላችሁ፤ በዚህም እግዚአብሔርን ልታመሰግኑ ይገባችኋል» ብለዋል።


በሦስተኛ ቀን አገልግሎታቸውም ለቅዱስ ዮሐንስ ዓመታዊ የንግሥ በዓል ከማኅሌት አገልግሎት ጀምሮ ቀድሰው በማቁረብና «ሁለቱም በእግዚአብሔር ፊት ጻድቃን ነበሩ» በሚል ዐቢይ ርዕስ ሰፋ ያለ ትምህርትና ምክር ሰጥተዋል። በትምህርታቸውም «ስለ ስሙ የሚገዙትን እግዚአብሔር አምላክ ከሁሉም አብልጦ ይወዳልና ካህኑ ዘካርያስ እና ኤልሳቤጥ በእግዚአብሔር ፊት የነበራቸውን የጽድቅ ሕይወት አስቦ እንደ አዘኑና እንደተከዙ አረፍተ ዘመን እንዳይገታቸው በማለት በእርጅናቸው ዘመን በመልአክ ብሥራት «ከሴቶች ከተወለዱት መካከል እንደ እርሱ ያለ አልተነሳም» የተባለለትን እና ሲጸነስ የአባቱን አንደበት የዘጋውን፣ በማኅጸን ሳለ ለእመቤታችን የሰገደውን፣ ሲወለድ የአባቱን አንደበት የከፈተውን፣ በኋላም አምላኩን ያጠመቀውን መጥምቀ መለኮት ቅዱስ ዮሐንስን ሰጣቸው» ብለዋል።

በእግዚአብሔር ፊት ጻድቅ መሆን ማለት አንዱ መገለጫው አዛውንትና ጎልማሶች ቅዱስ ሥጋውን እና ክቡር ደሙን የሚቀበሉበትን፣ ሕጻናት እግዚአብሔርን በመፍራት የሚያድጉበትን፣ ወንጌል የሚስፋፋበትን ቤቱን መሥራት ነውና እናተም ይህንን ታላቅ ቤተ ክርስቲያን መሥራታችሁ በእጅጉ ያስመስግናችኋል፣ ስማችሁ በዚህ በመቅደሱ እና በአርያም ባለች መዝገብም ተጽፎ ይኖራል ሲሉ አመስግነዋል። ይህን ሁሉ ከአደረጋችሁ በኋላ ግን እኛ በጥበባችን እና በገንዘባችን አደረግን ብላችሁ የምትመኩ ከሆነ በእግዚአብሔርና በእናንተ መካከል ያለው ድልድይ ይሰበርና ባላችሁበት መቅረት ብቻ እንጅ ማደግና መስፋት ስለማይኖር «እግዚአብሔር አደረገ!» ማለት ይገባችኋል ሲሉ ምእመናንን በአጽንዖት መክረዋል። አያይዘውም የቤተ ክርስቲያንን ሰላምና አንድነት ከመጠበቅና ከማጽናት አንጻር የቤተ ክርስቲያኒቱ አገልጋይ ካህናት ትልቁን ኃላፊነት ሊወስዱ እንደሚገባቸውና  እግዚአብሔርን እና ሁልግዜም  «እሺ!» እያለ የሚታዘዘውን ምእመን ላለማሳዘን በመደማመጥ፣ በመመካከርና፣ እኔ ከሁሉ አንሳለሁ በሚል ትኅትና ልታገለግሉና የቤተ ክርስቲያኑን አንድነት በዘለቄታው የመጠበቅ ኃላፊነትን ልትወጡ ይገባል ሲሉ ከአደራ ጋር ለአገልጋይ ካህናት አሳስበዋል።

ቅዱስ ፓትርያኩን ብፁዕ ወቅዱስ አቡነ ማትያስን ጨምሮ ቤተ ክርስቲያናችን ተገኝተው ሲባርኩን ስድስተኛው ሊቀ ጳጳስ የሆኑት ብፁአ አባታችን አቡነ ማቴዎስ የሐምሌ ፭ የጳውሎስ ወጴጥሮስን በዓል በኪዳን ጸሎት ቤተ ክርስቲያናችን ተገኝው አክብረውና ምእመኑን ባርከው ማክሰኞ ሐምሌ ፭ ቀን ወደ ዋሽንግተን ዲሲ አምርተዋል። እግዚአብሔር አምላክ ለብፁዕ አባታችን ረዢም የአገልግሎት ዘመን ከሙሉ ጤንነት ጋር እንዲሰጥልን ፈቃዱ ይሁን!